092. Az esztergami káptalan az esztergami várostéren lévő házait Herbold és Ibur polgároknak bérbe adja. 1243.

Capitulum Strigoniense oniuersis presentes litteras inspecturis salutem in Domino. Ad uniuersitatis vestre noticiam uolumus peruenire, quod nos dilectis nostris Herbordo et Ybur, filiis quondam Stephani, ciuibus Strigoniensibus, locamus domum nostram lapideam cum curia circumiacente, sitam super forum Strigoniese prope palacium Henie, longitudo cuius curie est septuaginta cubitorum, qui uulgo appellantur reyf, latitudo uero quadraginta et unius cubitus. Item quandam curiam ex posteriori parte dicte domui lapidee continguam uersus Sanctum Laurencium quadam via solummodo intermedia, cuius longitudo est triginta quinque cubitorum, latitudo uero triginta quatuor cubitorum; pro se et heredibus suis legitimis, et non extraneis, perpetuo possidendas. Hoc pacto et hys condicionibus interuenientibus, quod predicti Herbordus et Ybur et eorum heredes teneantur nobis soluere annuatim duas marcas argenti pro dicta domo lapidea, et unum fertonem pro dicta curia, nomine pensionis usque ad quindecim annos videlicet; quindecim annis uero completis debeant soluere singulis annis usque in perpetuum tres marcas argenti et dictum fertonem; primam partem in festo Sancti Michaelis, secundam partem in Dominica prima Quadragesime, terciam partem in festo Sancti Johannis Baptiste. Et hec attendere promittunt sub pena dupli. Est eciam adiectum, quod nec eis, nec heredibus ipsorum liceat vendere uel alienare predictam domum, neque predictam curiam, nisi causa necessitatis ipsorum; et tunc de nostra licencia speciali; aliter uero facta uendicio uel alienacio non valeat, et si uendiderint, uel alienauerint, emptor nobiscum de novo conuenire debeat super pensione nobis persoluenda. Si que vero hedificia in eodem fundo edificaverint lapidea uel lignea de nouo, ea pro voluntate sua distrahant et alienent. Nos autem promittimus eydem, quod in hac locacione eos manutenebimus contra quemcunque et quoscunque, et defendemus. Actum et datum Strigonij in Ecclesia Beati Adalberti in pleno Capitulo, anno Domini millesimo ducentesimo quadragesimo tercio, mense Augusti, in festo Sancti Stephani Regis. Venerabili patre domino Stephano Episcopo Waciensi existente, postulato ac procuratore Strigoniensis Ecclesie, et Magistro Achille Preposito existente; Magistro Petro Cantore. Et quia sigillum maius ad presens non habemus, sigillum nostrum minus presentibus duximus apponendum. Et ut eisdem maior fides adibeatur, predicti venerabilis patris domini Stephani Dei gracia. Waciensis Episcopi, postulati ac procuratoris nostri, sigillo fecimus roborarj.

(Az eredeti után Knauz Nándor, Magyar Sion II. köt. 523. l.)