Gregorius Episcopus seruus seruorum Dei venerabili fratri ... Archiepiscopo Strigoniensi salutem et Apostolicam benedictionem. Eterna providentia conditoris Sanctam et immaculatam Ecclesiam a sue fundationis exordio eo voluit ordine gubernari, ut uni pastori, potestatis plenitudinem obtinenti, ceteri partem sollicitudinis assumentes, tanquam membra capiti, communicatis alterutrum emergentibus casibus, unione indissolubili cohererent, per quam eis consensibus mutuis solidatis, caput famulantibus membris vigorem assumeret, et membrorum conditio de sui principii robore firmaretur. Quia igitur grandes Apostolice Sedis eventus et casus te ignorare non convenit, tanquam necessarium matris Ecclesie munimentum, propter que necessitate urgente tuam et aliorum videmus presenciam plurimum oportunam, fraternitatem rogamus et hortamur attente, per Apostolica tibi scripta precipiendo mandantes, quatenus usque ad proximum festum Resurrectionis Dominice ad nostram presenciam personaliter venire procures, omni occasione cessante, ut habeat Ecclesia mater in filio speratum in tua visitatione solatium et gratum providi consilii fulcimentum; proviso ut in personarum et evectionum moderato numero venias, ne nimis Ecclesie tue onerosus existas. Preterea volumus et mandamus, ut suffraganeorum tuorum Capitulis, Abbatibus et Prelatis aliis tue provincie, qui specialiter non vocantur, auctoritate nostra iniungas, ut super hiis eodem termino ad Sedem Apostolicam fideles et providos nuntios mittere non postponant. Datum apud Criptamferratam V. idus Augusti, (Pontificatus nostri) anno XIIII.

In e. m. Archiepiscopo Colocensi, Episcopo Geuriensi, Episcopo Zagrabiensi, Episcopo Quinqueecclesiensi, Episcopo Ultrasilvano, Abbati Sancti Martini de Pannonia.

(Theiner id. m. I. köt. 179. l. V. ö. Fejér Cod. Dipl. IV. köt. 1. r. 184. l.)