061. Az egresi konventnek bizonyságlevele Miklós comes végrendelkezéséről. 1239.

Vniuersis Christi fidelibus tam presentibus quam futuris presentem paginam inspecturis frater A. dictus Abbas de Egres et eiusdem locj Conuentus salutem in domino uite presentes et future. Nouerit vniuersitas uestra, quod cum bone memorie N. Comes de Guedech, frater V. Strigoniensis Archiepiscopi, laboraret in extremis, A. tunc temporis Priorem, S. Subpriorem, H. Custodem nostrum ad se fecit accersiri confessione, quod salutifera peccatorum permissa litteras domini A. et B. Regum, et Capituli Albensis eisdem obtulit testimoniales, quod dum ipse prosperis adhuc habundaret successibus, possessionesque suas et predia in quatuor partes diuisisset tribus filiis, Isaac scilicet, Laurencio et Johanni, partem propriam cuilibet assignando; ne per ejus obitum discordia pullularet inter fratres, excepta terra Houd, quam ipse dimisit in commune; quartam partem tamen libere sibi reseruasset, uidelicet villam Guedech, Gut, Miclous, Trucman, villam Nadayp, et villam Nouam, cum omnibus pertinenciis, pecudibus et familia; quod cui uellet, eam posset dare, aut in elemosinam conferre, in uita uel in morte. Processu uero temporis, quando Deus quartum ej concesserat filium, parte ad se pertinente ditare illum cogitauit; ita tamen, quod partes predictorum L. et J. cum parte junioris nomine March deberent estimari, et diuisione reiterata iusticia preuia unusquisque partem suam sortiretur; nichilominus a uillis quatuor Guedech, Gut, Trucman, Nadayp, coniugem suam decreuit esse inmunem et expertem. Propterea tamen (non) est pretereundum, quod si aliquem de tribus fratribus, idest L. et J. et M., mori contingeret, pars illjus ad duos superstites ex integro uolueretur. In hys omnibus predictus I. nullam potest habere questionem, tamen in prefata terra Houd, quam quatuor fratribus decreuit dimittendam, filiabus autem suis nihil omnino dimisit; sed matri et tribus fratribus L. et J. et M., eas commisit honorifice maritandas. In hujus rej testimonium presentes litteras fecimus scribj, et sigillj nostri munimine roborarj. Actum in Egres, anno Dominice Incarnacionis Mş CCş tricesimo nono.

(Az eredeti után Ráth Károly, Hazai Okmánytár I. köt. 21. l.)