032. A kiküldött királyi birák a vasvári káptalant Megyehid és Kinis javaknak birtokában megerősítik. 1237.

Gregorius Dei gracia Episcopus Jauriensis, Chaak Comes Soproniensis, Haholth Comes Castri Ferrei, judices in abolendis perpetuitatibus per dominum Belam Regem Hungarie constituti, vniuersis presens scriptum inspecturis salutem in Domino Jhesu Christo. Ad vniuersorum noticiam volumus peruenire, quod cum Capitulum Ecclesie Sancti Michaelis de Ferreo Castro causaretur nobis coram, pro destruccione predij Megyehyd, et violenta illius occupacione, et pro sexaginta iugeribus terre, que de predio Kyniz versus alteram villam Kyniz vduornici predicte Ecclesie subtrahere moliebantur, nomine possessionis cuiusdam viri nomine Raim, predicto Capitulo, ut idem predium, et predicta sexaginta iugera terre, iuste semper et pacifice possederit, probacionem indixerim; cumque dictum Capitulum predium predictum et predicta sexaginta iugera terre iuste et pacifice a temporibus Bele Regis Magni se possedisse testimonio sufficienti comprobasset, nos dictante iusticia sepedictum predium Megyehyd nomine, et sexaginta iugera terre in uilla Kyniz, Ecclesie Beati Michaelis adiudicauerimus, libere, et pacifice cum molendino, quod est in predio Megyehyd, in quo due rote voluuntur, possidenda, sicut ipsum Capitulum nobis constitit primitus possedisse. Vduornici eciam prememorati, ne aliquando inter Capitulum et ipsos, super sepedicto predio, et sexaginta iugeribus terre, controuersia posset exoriri, assumptis pristaldis nostris, Tynca scilicet de Herman, et Emerico, ipsimet euntes, nouas iuxta metas antiquas in predio Megyehyd, ob testimonium iustificacionis Ecclesie erexerunt, que sicut per pristaldos nostros predictos presente vtraque parte, non contradicente, sed consenciente intellexerimus, tali sunt ordine collate. Ad latus orientale incipiunt ab aqua Gungus, et tendentes versus septemtrionem intrant uiam magnam, continentem duas metas; et abhinc acerui metarum interiacente eadem via protenduntur ad spinosam distinccionem, que vlgo dicitur mege dupplici meta consignatam, et in eadem distinccione progredientes veniunt ad lutosum riuum cuius deinde cursui obuiantes veniunt ad villam Femie, ibique sub piro contingunt viam quandam metis publicis cognoscendam, in qua rursus via procedunt ad trium viarum coniunccionem, habencium unam metam de Wep, alteram de Femie, terciam Ecclesie pertinentem; deinde retorquentes ad meridiem, et iuxta terminos Vepiensium procedunt vsque ad aquam Gungus, quam transeuntes, girum faciunt in aluei margine, in quo prius aqua Gungus decurrebat, in modum insule, et sic demum ad metam priorem reuertuntur. Et insimiliter in predio Kyniz metas renouauerunt. In cuius rei testimonium presentes litteras concessimus sigillorum nostrorum munimine roboratas; anno Dominice Incarnacionis millesimo ducentesimo tricesimo septimo.

(Mátyás királynak 1489-ki átiratából, mely a szombathelyi káptalannak levéltárában őriztetik.)