330. II. Endre királynak bizonyos sójövedelmet tárgyazó adakozása a pernói apátság számára. 1233.

In nomine Sancte Trinitatis et Indiuidue Unitatis. Andreas tercius (így) Dei gracia Ungarie, Dalmacie, Chroacie, Rame, Seruie, Gallicie, Lodomerieque Rex, Abbati et Conuentui Sancte Margarete de Pernou Cisterciensis Ordinis, et eorum successoribus in perpetuum. Per presens scriptum cunctis nunc et imposterum facimus manifestum, quod cum nos, pro nostri nostrorumque predecessorum ablucione peccatorum; Ecclesie uestre contulerimus mille zuanos, in Woswar a salinariis annuatim circa festum Sancti Joannis Baptiste, in prima uia sine omni contradiccione, diminucione et dilacione persoluendos jure perpetuo; Comiti de Woswar, quicunque fuerit, ediccione Regali iniungentes, quod si dictos sales salinarij soluere recusarent, Ecclesie ipsi ad recipiendum auxilium amministret; et iuxta transaccionem, que inter venerabilem patrem dominum Jacobum Prenestinum Electum, Apostolice Sedis Legatum ex una parte, et nos ex altera intercessit, hanc dantes uobis et uestris successoribus libertatem, ut omnes predictos sales libere et absque ulla contradiccione et molestacione nostra uel aliorum, absque cuiuslibet prestacione tributi, ad usus uestros retinere possitis. Ut autem hec nostre concessionis et libertatis pagina robur perpetue obtineat firmitatis, contra quam scienter non ueniemus, nec contra alia priuilegia monasterio uestro a nobis aut predecessoribus nostris indulta, Regio sigillo eam uolumus communiri; statuentes, ne nos aut nostrorum aliquis successorum, uel aliquis alius contra ea quicquam audeat attemptare, uel ei ausu temerario contraire. Datum per manus Reuerendi Vgrini Colocensis Archiepiscopi, aule nostre Cancellarij, anno Dominice Incarnacionis M° CC° XXX° III°. Indiccione VI. kalendis Octobris. Venerabili R. Strigoniensi Archiepiscopo existente, Cleto Agriensi, Gregorio Geuriensi, Briccio Waciensi, Bartholomeo Wesprimiensi, Stephano Zagrabiensi, Bartholomeo Quinque-Ecclesiensi, Reynaldo Transsiluano, Bulch Cenadiensi, Benedicto Waradiensi Episcopis existentibus, Ecclesias Dei feliciter gubernantibus. Dionisio Comite Palatino, Demetrio aule nostre Curiali Comite et Baciensi, Nycolao filio Borz Supruniensi, Latislao Musoniensi, Petro fratre Marcelli Nytriensi, Stephano Bichoriensi Comitibus; Nycolao Magistro Tawarnicorum et Comite Posoniensi, Mauricio Dapiferorum, Michaele Agasonum, Bagin Pincernarum Magistris, et alijs quam pluribus Comitatus tenentibus, Regni nostri anno XXX.°

(Eredetie bőrhártyán, melyről a király nagy pecsétje sárga-zöld selyemzsinóron függ, a főmélt. hg. Batthyányi család levéltárában.)