306. Az esztergami káptalannak bizonyságlevele, hogy Lőrincz esztergami pénzverőnek özvegye és fia, tatai birtokukut Florentin szebeni prépost és esztergami kanonoknak eladták. 1230.

Thomas Prepositus et Capitulum Strigoniense omnibus, ad quos littere presentes peruenerint, oraciones in Domino. Vniuersitati uestre significamus, quod mulier quedam Almanda nomine, filia Danielis, uxor quondam Laurencij Latini, auri malliatoris de Strigonio, et Perrin filius eiusdem Laurencij, cum Florentino Preposito Scibiniensi nostro concanonico, coram nobis constituti, terram ad vnum aratrum, quam habebant vltra Danubium in villa Thata iuxta Gron, tam illam quam secum, cum ad coniugium ipsa transiit, tulerat, quam eciam illam, que a patre predicti Perrin fuerat empta, cum suis pertinencijs, cum nostro et villanorum consensu, uendiderunt prefato Preposito pro sex marcis argenti et dimidia perpetuo possidendam; cuius precium ab eodem Preposito coram nobis plenarie receperunt. Preterea est quedam terra in eadem uilla non partificata, de qua Prepositus habebit in porcione sua, quantum alij duo homines de uilla; cum autem contigerit eam partificari, equali gaudebit porcione, qua et alij duo homines in pratis et in pascuis, et in ripis, in montibus et in uallibus, spectantibus ad eandem uillam. Preterea predictus Prepositus habebit ante ecclesiam Sancti Mauricij duas mansiones, et duas plateas ad duo molendina edificanda, et duas mansiones in longum ripe. Preterea idem Prepositus habebit duo prata feneti circa Granam, et vnum ultra Granam. Est eciam supra Granam quoddam buscagium, de quo dictus Prepositus habebit tantam partem, quantam alij duo homines habent de uilla. Vt igitur hec coram nobis legitime acta perpetue firmitatis robur obtineant, ad peticionem uenditorum prefato Preposito litteras super hys concessimus testimoniales sigilli nostri munimine roboratas. Anno ab Incarnacione Domini M° CC° XXX°. Datum per manus Magistri Benedicti Lectoris Strigoniensis.

A. B. C. D.

(Az eredeti után Knauz Nándor, Magyar Sion II. köt. 288. l.)