In nomine Sancte Trinitatis et Indiuidue Unitatis. Andreas Dei gracia Hungarie, Dalmacie, Croacie, Rame, Seruie, Gallicie Lodomerieque Rex in perpetuum. Cum ex Regie dignitatis officio teneamur metiri merita singulorum, et cuique pro meritorum exigencia respondere; iustum est et racioni consentaneum, vt infideles et iniquitatis sectatores radicitus euellamus et disperdamus; bonos vero et equitatis amatores, qui fideliter ad utilitatem Regie Corone, et Regni commodum se exercent, munifice donis decorare non postponamus. Hinc est, quod ad uniuersorum noticiam presencium et posterorum uolumus peruenire; quod cognita infidelitate jobagionis nostri Domaldi de Crhoacia, quam contra Regiam Coronam perpetrarat, consilio omnium jobagionum nostrorum, quandam possessionem suam, que incipit ab aqua Cerea, descendens ad mare uenit usque Zadur, fidelibus Comitibus nostris Gregorio et Stephano, et fratribus eorundem, propter indecidue fidelitatis obsequia ipsorum, que nobis indesinenter et indefesse exhibuerunt; maxime quoniam jam dictus Domaldus prenominatorum fidelium nostrorum Gregorij et Stephani terram, viribus exterorum Regnorum requisitis, adducto exercitu deuastauit, in recompensacionem tantorum meritorum, ipsis, et per eos suis heredibus et heredum successoribus iure perpetuo contulimus possidendam; quam sepe nominatus D. et cognati eiusdem ab auo suo ceco Zoloyna obtinuerunt, introducentes ipsos per fidelem nostrum Gregorium filium Jaduch Comitis in predictam possessionem. Ut autem hec a nobis facta donacio salua semper et inconcussa permaneat, presentem concessimus paginam sigilli nostri munimine in perpetuum roboratam. Datum per manus Cleti aule nostre Cancellarij et Agriensis Prepositi, anno uerbi incarnati millesimo CC° XX° tercio. Ecclesia Strigoniensi vacante, Reuerendo Vgrino Colocensi Archiepiscopo existente; Desiderio Chaneadiensi, Stephano Zagrabiensi, Ruberto Wesprimiensi, Thoma Agriensi, Alexandro Waradiensi, Bartholomeo Quinque-Ecclesiensi, Briccio Waciensi, et alijs Episcopis Ecclesias Dei feliciter gubernantibus. Jula Palatino, et Comite Budrugiensi, Nicolao Curiali Comite Regine et Comite Supruniensi, Salomone Bano, Batetz Curiali Comite Curie nostre et Comite Bekesiensi, Pous Bihoriensi, Buzad Posoniensi, Laurencio Vyuariensi, et alijs Comitibus Comitatus tenentibus, Regni nostri anno XX°

(Eredetie bőrhártyán, melyről a pecsét már elveszett, a leleszi konvent levéltárában. Ugyanazon okmánynak egy másik, arany függő pecséttel kiadott példányát 1845. mélt. Fluck Eduard, akkor a kir. ügyek aligazgatójánál láttam. Néhány lényeges hibával kiadva Fejér György által Cod. Dipl. III. köt. 1. r. 402. l.)