Honorius Episcopus servus servorum Dei venerabilibus fratribus... Vesprimiensi et... Agriensi Episcopis salutem et Apostolicam benedictionem. Intellecto, venerabilem fratrem nostrum... Episcopum Quinque-Ecclesiensem in duobus pati defectum, scientia scilicet et etate, mandamus super etate diligenter inquiri; et si eum constiterit, electionis sue tempore etatis legitime non fuisse, quicquid de eo factum est, volumus irritari. Ceterum cum inventus sit, sufficientem non habere scientiam litterarum, eum in spiritualibus a pontificalium executione suspendimus usque ad nostre beneplacitum voluntatis; ut si de legitima etate docuerit, et studio subsequente suppleverit quem patitur in litteratura defectum, eidem gratiam, prout expedire videbimus, faciamus. Ad hec... Strigoniensem Archiepiscopum, qui ad confirmationem et consecrationem dicti Episcopi Quinque-Ecclesiensis contra Generalis Concilii statuta processit, eiusdem Concilii animadversione punimus; ut videlicet non solum confirmandi primum successorem illius careat potestate; verum etiam a perceptione proprii beneficii sit suspensus; donec, si equum fuerit, indulgentiam mereatur, ipsius beneficii fructibus interim in aliquam evidentem utilitatem Strigoniensis Ecclesie de vestrum conscientia et consilio convertendis. Ideoque per Apostolica vobis scripta mandamus, quatenus hec Strigoniensi et Quinque-Ecclesiensi Ecclesiis publicantes, et quatenus ad ipsum Archiepiscopum pertinet, facientes per censuram ecclesiasticam, appellatione remota, firmiter observari; iniungatis Capitulis, Clero et universis subditis Quinque-Ecclesiensis Ecclesie, ut procuratoribus, quos idem Episcopus in spiritualibus de conniventia nostra providit, et sibi ac illis, quos procuratores in temporalibus duxerit providendos, intendentes humiliter et devote, de iustitiis Episcopalibus eis curent sine difficultate qualibet respondere. Datum apud Urbem veterem VIII. kalendas Septembris, Pontificatus nostri anno quinto.
(Theiner, Vetera Monumenta Historica Hungariam Sacram illustrantia I. köt. 25. l., v. ö. a pápának a pécsi püspökhez intézett rendeletét Fejérnél Cod. Dipl. III. k. 1. r. 295. l.)