113. III. Kelemen pápa a spalatoi érseknek a palliumot átküldvén, érsekségének jogait és birtokát az apostoli szék pártfogása alá helyezi. 1191.

Clemens Episcopus servus servorum Dei venerabili fratri Petro Spalatensi Archiepiscopo, salutem et Apostolicam benedictionem. In Apostolicae Sedis specula disponente Domino constituti, fratres nostros Episcopos, tam propinquos, quam longe positos, fraterna charitate diligere et eorum postulationibus effectum celerem indulgere debemus. Eapropter, venerabilis in Christo frater Archiepiscope, tuis precibus annuentes, Spalatensem Ecclesiam, cui Deo auctore praeesse dignosceris, ad exemplar felicis reminiscentiae Pachalis Papae praedecessoris nostri, sub Beati Petri et nostra protectione suscipimus, et praesentis scripti privilegio communimus, statuentes, ut quascumque possessiones, quaecumque bona eadem Ecclesia in praesentiarum juste et canonice possidet, aut in futurum concessione Pontificum, largitione Regum vel Principum, oblatione fidelium, vel aliis justis modis Deo propitio poterit adipisci, firma tibi, tuisque successoribus, et illibata permaneant. In quibus haec propriis duximus exprimenda vocabulis: Villam Sancti Georgii cum omnibus pertinentiis suis, Cosiza, Ostrogo, Labina, Serenine, et cum omnibus appendiciis suis; totum territorium de Creme; montem Crassum; Asceze; Malorne, Delamoze; Classine; et territorium de - - - - Ecclesiam Sanctae Mariae in Salona cum molendinis, aquimoliis, et omnibus pertinentiis suis; Ecclesiam Sancti Moysi in Salona cum omnibus pertinentiis suis; Ecclesiam Sancti Stephani in Salona cum omnibus appendiciis suis; Ecclesiam Sancti Bartholomaei de Tennine cum omnibus pertinentiis suis; Parochiam Cleunae; Parochias Citinae, Clissae, cum tota Jupania Polici, cum toto Massaro, et Parochiam Almissii usque ad Mocharum, et usque ad flumen de Narente; et totam Bastizam; Segniensem, Corbaensem, Nonensem, Scardonensem, Traguriensein, Tiniensem, Machariensem, Naroniensem, Stagnensem, Farensem, Bosnensem, et Delmitensem Episcopatus. Paleum (így) praeterea fraternitati tuae, plenitudinem nimirum Pontificalis officii, Apostolicae Sedis liberalitate concedimus, quo te intra Ecclesiam tuam ad missarum solemnia subscriptis diebus noveris induendum: id est Coenae Domini, Resurrectionis, Ascensionis, Pentecostes, Nativitatis Domini, Epiphaniae, in tribus festivitatibus Sanctae Mariae, omniumque Apostolorum, Nativitatis Sancti Joannis Baptistae, solemnitate Sancti Domnii, in consecrationibus Ecclesiarum, Episcoporum, presbyterorum, et diaconorum, ac subdiaconorum Spalatensis Ecclesiae, et consecrationis tuae die. Cujus nimirum palei volumus te per omnia - - - vendicare. Hujus siquidem indumenti honor humilitas atque justitia est. Tota ergo mente fraternitas tua se exhibere pertinet in prosperis humilem, in adversis, si quando adveniunt, cum justitia rectum, amicum bonis, perversis contrarium; et nullius unquam faciem contra veritatem recipiens, nullis unquam faciem pro veritate loquentem premens, misericordiae operibus juxta veritatem substantiae insistens, et cui insistere etiam supra veritatem cupiens; infirmis compatiens, benevalentibus congaudens, aliena damna propria deputans, de alienis gaudiis tanquam de propriis exultans; in corrigendis vitiis pie saeviens, in fovendis virtutibus auditorum animos demulcens - - - - - judicium sine ira tenens, in tranquillitate autem severitatem juxta mensuram non deserens. Haec est, frater carissime, palei accepti dignitas, quam si sollicite servaveris, quod foris accepisse ostenderis, intus habebis. Decrevimus ergo, ut nulli omnino hominum liceat praefatam Ecclesiam temere perturbare, aut ejus possessiones auferre, ablatas retinere, minuere, seu quibuslibet vexationibus fatigare; sed omnia integra conserventur eorum, pro quorum sustentatione concessa sunt, usibus omnimodis profutura, salva Sedis Apostolicae auctoritate. Si qua igitur in futurum ecclesiastica saecularisve persona hanc nostrae constitutionis paginam - -- - contra eam temere temptaverit - - - nisi reatum suum digna satisfactione correxerit, potestatis honorisque sui careat dignitate, reumque se Divino judicio existere de per petrata iniquitate cognoscat, ac a Sacratissimo Corpore et Sanguine Dei ac Redemptoris nostri Jesu Christi alienus fiat, atque in extremo examine distincto judicio subjaceat. Cunctis autem eidem loco sua jura - - - - fiat pax Domini nostri Jesu Christi, quatenus, et hic fructus bonae actionis percipiant, et apud districtum Judicem praemia aeternae pacis inveniant. Amen.

Ego Pandulphus Presbyter Cardinalis Basilicae XII Apostolorum ss.

Ego - - Sanctorum Joannis et Pauli Presbyter Cardinalis ss.

Ego Joannes N. Sancti Clementis Cardinalis Tuscanus Episcopus ss.

Ego Romanus N. Sanctae Anastasiae Presbyter Cardinalis ss.

Ego Hige Presbyter Cardinalis Sancti Martini ss.

Ego Joannes Ecclesiae Sancti Stephani Valle Mon. Presbyter Cardinalis ss.

Ego Sancti Cosmae et Damiani Diaconus Cardinalis ss.

Ego Girardinus Sancti Donati Diaconus Cardinalis ss.

Ego Gofredus Sanctae Mariae in Via Lata Diaconus Cardinalis ss.

Ego Joannes Sancti Theodori Diaconus Cardinalis ss.

Ego Bernardus Sanctae Mariae Novae Diaconus Cardnalis ss.

Ego Georgius Sancti Marci in Aquino Diaconus Cardinalis ss.

Ego Gregorius Sancti Georgii ad Vellum Aureum Diaconus Cardinalis ss.

Ego Lotharius Sanctorum Sergii et Bacchi Diaconus Cardinalis ss.

Ego Nicolaus Sanctae Mariae in - - -

Datum Laterani per manum Moysi Sacrae Romanae Ecclesiae Subdiaconi Lateranensis. III. Idus Martii, Indictione X. Incarnationis Dominicae anno MCXCI. Pontificatus vero Clementis Papae tertii anno primo.

(Farlati, Illyricum Sacrum III. köt. 223. l.)