In Christi nomine Amen. Anno Nativitatis ejusdem Domini Nostri Jesu Christi millesimo. Indictione tertia (helyesebben „decima tertia”). Regnantibus Dominis Nostris Basilio et Constantino Imperatoribus, in Regno Croatiae gubernante autem Domino Dircislavo inclyto Rege, residente etiam in Sede Beati Domnii Domino Martino Reverendissimo Archiepiscopo, una cum Domino Florino Principe Spalati et Clisii, in pactis quidem superius dictis, principibus tempore.
Ex quo ab exordio mundi primi parentes in peccatum inciderunt, ejectique fuerunt de paradiso deliciarum, et expulsi sunt in regionem mortis; et omnis status hominum ex tunc sit subiectus, et ob id omnis mortalis homo repentinam formidet mortem, et accidentalem, ne imparatus existens morti perpetuae in aeternam incideret poenam. Hanc ob causam ruminantes, et considerantes cogitavimus nos supradicti simul, et concorditer, inspirante nos Spiritu Sancto, pro redemptione animarum nostrarum, nostrorumque parentum, ac haeredum nostrorum usque ad finem mundi, fecimus aedificare domum Dei ad honorem Sanctorum Dei suprascriptorum, in loco prope litus maris sive prope arenam.
Primum prece obtinuimus a Rege saxa Theatri, ex quibus Ecclesiam fabricaremus, et ille dedit nobis et saxa et omnem circuitum terrae Theatri ad honorem Dei, et Ecclesiae Beati Michaelis Archangeli.
Ego Plesus in primis emi terrenum, super quod aedificavimus Ecclesiam a quodam homine Slavonico nomine Sidica, qui fuit de loco nuncupato Chesica, et a fratre suo Cero octo denariis, quod habere, quo gaudere, frui, usufructuare, et facere de ipso quidquid nobis placuerit.
Aliud enim emi terrenum juxta Ecclesiam ab occidente a Firmarisco Chirini trium wretenorum, denariis X; volo, et jubeo, ut sit dictae Ecclesiae.
Et juxta dictum terrenum emi aliud terrenum a quodam Strio Zafilii Zenici denariis quinque; volo ut sit istius Ecclesiae.
Item emi terrenum prope litus maris sub sabulo a Zubinico denariis X, quod est juxta flumen in loco vocato Phrodrupglane; volo, ut sit hujus Ecclesiae. Post haec Theodorus filius ejus accepit a me dictum pretium, et firmam quietationem.
Item emi portum illum post Ecclesiam contra portam Theatri a mari usque ad viam publicam terreni Prodani, ubi est murus in medio vetustus infra terrenum ejus, et meum, quod emi a dicto Prodano denariis XXXV volo, ut sit in hac Ecclesia.
Emi etiam terrenum a superiori parte arenae wreteni unius a dicto Sidica denariis X; volo ut sit dictae Ecclesiae.
Item ibidem emi juxta illud terrenum aliud a Trapico denariis tribus; volo ut sit ejusdem Ecclesiae.
Emi quoque aliud terrenum in valle, quae dicitur Tri bis, et a Michaele filio Tribiseti denariis viginti; volo ut sit in dicta Ecclesia.
Item in eodem loco emi tres funiculos terrae a Trimonio, et fratre suo Peciazito denariis VIII; volo ut sit dictae Ecclesiae.
Item similiter emi unum terrenum a Bericino Cirvica Tobri denariis VII; volo ut sit hujus Ecclesiae.
Emi etiam terrenum in loco, qui dicitur Lichina a Chiso, qui est de loco dicto Repusina, denariis XX; sit dictae Ecclesiae.
Emi terrenum in loco dicto Barda apud salinas usque supra viam; volo ut sit istius Ecclesiae.
Emi itidem terrenum in loco dicto Billa a Petralo, qui fuit a Repusina denariis quinque; volo ut sit in hac Ecclesia.
Etiam emi ibidem terrenum juxta Stiniza sub rupem, ab una parte rupis usque ad alteram, a Pazina denariis XX; volo ut sit dictae Ecclesiae.
Item in eodem loco emi terrenum trans torrentem, qui labitur a Billa ab oriente, a Civicito Buzaicho denariis XX; volo ut sit hujus Ecclesiae.
Emi etiam terrenum in loco dicto Slano in vallem incipiens a mari usque ad viam publicam, et a costa, quae usque ad mare protenditur, totam vallem illam a Diacono Dabro, et a filio ejus Dominico, denariis triginta; volo ut sit in eadem Ecclesia.
Ibi etiam juxta dictam vallem emi similiter terrenum alterum a parte orientali mei terreni usque ad torrentem, et viam publicam, a Dazina octo denariis; volo ut sit in eadem Ecclesia.
Emi etiam terrenum in loco, qui dicitur Schulcha, juxta terrenum Domnii Praestancii a Glubaz denariis quinque; volo ut sit istius Ecelesiae.
Item ego Pincius cum fratribus meis, et nepotibus superius nominatis, omnes unanimiter simul focto consilio dedimus duos molendinos, quos Majestas Regia dederat nobis in perpetuum et posteris nostris; hos dedimus Ecclesiae Sancti Michaelis, et cum Insula, quae super illos est, prope quam volvitur rota molendini ab oriente, et juxta quam decurrit aqua ad fullas, et molendinum Regium, parte autem occidentis ad molendina Sancti Michaelis.
Haec facta sunt anno Domini millesimo septuagesimo tertio, (helyesebben 1000. „Indictione decimatertia”), mense Augusti die prima, coram judicibus, et testibus Joanne Podcupica, et fratre ejus Zulico, Negusio Podcupica, Cinico Tabiscavico, et Joanne Curino, Maiano Bravara.
Ista autem pecunia supradicta terrenorum fuit ultimum pretium, sive superadditio pretii.
(U. o. III. köt. 112. l.)