Vniuersis Christi fidelibus presentes litteras inspecturis, Capitulum Ecclesie Posoniensis salutem in Domino. Ad vniuersorum noticiam tenore presencium uolumus peruenire. Quod nobili uiro Comite Thoma de Poky ab una parte, Ladislao filio Morcolfi pro se et pro Nicolao ac Maharia, fratribus suis ab altera, coram nobis personaliter constitutis, idem Comes Thomas quandam particulam terre sue arabilis de Saralia, exemptam et excissam a terris populorum suorum in eadem uilla Saralia existencium, quam quidem particulam terre pro usu sui proprij aratri consueuerat retinere, simul cum nemore, quod iacet in fine predicte particule terre, et protenditur usque ad ecclesiam in eadem uilla Saralia existentem, pro seruiciis eorundem Ladislai, Nicolai et Maharie, quod sibi fideliter et indefesse preterite inpenderunt et inpendere poterunt in futurum, dedit, contulit et donauit eis, ex parte sui et filiorum suorum inrevocabiliter in nostri presencia perpetuo possidendam; obligando se, quod quicunque processu temporum, siue filij sui, seu aliqui alij de cognacione sua sepedictos Ladislaum, Nicolaum et Mahariam racione prefate particule terre, et predicti nemoris retro ecclesiam existentis, impetere attemptarent, ipse teneretur eos expedire proprijs laboribus et expensis. In cuius rei memoriam presentes cocessimus litteras sigilli nostri munimine roboratas. Datum in octauis Assumpcionis Beate Virginis. Anno Domini millesimo CC. octuagesimo sexto.

(Hártya. A még ép pecsét vörös selymen függ. Pozsonykáptalani országos levéltár Capsa XIV. Fasc. 7. Nr. 2. Knauz.)