A. B. C. D.

Capitulum Ecclesie Albensis universis presencium inspectoribus tam presentibus quam futuris salutem in Domino. Vniuersitati vestre tenore presencium innotescat, quod Lodomerius Comes filius Germani de Chafurd una cum magistro Jacincto Decano Ecclesie Vesprimiensis ad nostram accedendo presenciam petiuit, ut cum eo hominem nostrum fidedignum mitteremus, qui assercionem et proposicionem uxoris sue nomine Elene diligenter audiret, et post hec nostre audiencie seriatim recitaret. Nos igitur ipsius peticionem iustam attendentes in hac parte, fidelem nostrum Sixtum sacerdotem de choro ecclesie nostre ad uidendum et sciendum, quidquid prefata domina in ipsius presencia faceret et ordinaret, transmisimus. Qui postmodum rediens ad nos dixit, quod molendinum suum cum fundo curie et insula paruula ac eciam aliis pertinenciis situm in Vesprimio inter molendinum Capituli Vesprimiensis et molendinum Obud, quod sibi pro dotaliciis et rebus parafernalibus pertinuisse dicebat, uendidisset eidem Capitulo Vesprimiensi pro duodecim marcis argenti perpetuo iure et irreuocabiliter possidendum et ad eiusdem pecunie recepcionem maritum suum Lodomerium antedictum statuisset supplicando eciam nobis, ut hanc empcionis et vendicionis seriem litteris nostris privilegialibus muniremus. 212Igitur ipsas duodecim marcas argenti in terminis ad earundem solucionem deputatis prefatus Lodomerius a Jacincto iam dicti Capituli Decano plenarie recepit coram nobis, et sic tam pro se quam pro uxore sua memorata dictam uendicionem peciit nostri priuilegii munimine roborari. Ad quorum peticionem presentes litteras sigillo nostro munitas sepedicto Capitulo concessimus. Anno gracie M°CC°XL° nono, nonis Decembris. Magistro Achille Ecclesie nostre Preposito, Jacobo Cantore, Akus Custode, Michaele Decano existentibus.

(Eredetie a sz. mártoni főapátság levéltárában.)