Gregorius Episcopus etc. venerabili fratri... Episcopo Vesprimiensi salutem etc. Dilectus filius Magister Germanus, clericus tue Diocesis, in nostra constitutus presencia nobis humiliter supplicavit, ut cum super defectu natalium, quem patitur, de soluto genitus et soluta cum ipso de mandato nostro, quod in susceptis ordinibus ministrare et in presbyterum promoveri possit, sicut asserit, duxeris dispensandum, quod ecclesiasticum beneficium curam habens animarum annexam recipere valeat, dispensare cum eo misericorditer curaremus. De tua itaque discretione plenam in Deo fiduciam obtinentes mandamus, quatenus consideratis diligenter circumstantiis universis, que circa idoneitatem persone ipsius fuerint attendende, si inveneris, quod sit bone conversationis et vite, aliasque sibi merita suffragentur ad hujusmodi gratiam obtinendam, cum eo, de cujus litterarum scientia et honestate morum laudabile nobis testimonium perhibetur, super hoc dispensare procures, prout secundum Deum anime sue saluti videris expedire. Datum Laterani III. kal. Junii (Pontificatus nostri) anno XV.

(IX. Gergely pápa Regestáiból Theiner id. m. I. k. 183. l.)